Кыргызстан ислам университетинде «Улуттук баалуулуктар – руханий өнүгүүнүн негизи» аттуу тегерек стол өткөрүлдү

Кыргызстан ислам университетинде «Улуттук баалуулуктар – руханий өнүгүүнүн негизи» аттуу тегерек стол өткөрүлдү Кыргызстан ислам университетинде студенттердин улуттук аң-сезимин, мекенчилдик сезимин жана жарандык жоопкерчилигин жогорулатууга багытталган «Улуттук баалуулуктар – руханий өнүгүүнүн негизи» аттуу тегерек стол болуп өттү. Иш-чара «Улуттук дем – дүйнөлүк бийиктик» уңгужолунун идеяларын студенттик жаштар арасында жайылтуу, кыргыз элинин улуттук, руханий жана адеп-ахлактык баалуулуктарын даңазалоо, жаштарды мекенди сүйүүгө, улуттук мурастарды урматтоого жана коом алдындагы жоопкерчилигин сезүүгө тарбиялоо максатында уюштурулду. Тегерек столго Кыргыз Республикасынын Президентине караштуу Дин иштери жана этностор аралык мамилелер боюнча улуттук агенттиктин алдындагы Диний жана этностор аралык кырдаалды изилдөө борборунун башкы адиси Асылбекова Гульзар катышып, студенттер менен пикир алышты. Иш-чаранын жүрүшүндө улуттук баалуулуктардын коомдун руханий өнүгүүсүндөгү орду, жаштарды тарбиялоодогу мааниси, улуттук маданиятты жана салт-санааны сактоо, коомдогу ынтымак менен биримдикти бекемдөө маселелери талкууланды. Ошондой эле студенттер улуттук баалуулуктарды заманбап шартта жайылтуу, жаш муундун мекенчилдик сезимин күчөтүү жана коомдук жоопкерчилигин жогорулатуу боюнча өз ойлорун жана сунуштарын билдиришти. Тегерек столдун катышуучулары улуттук баалуулуктарды сактоо жана аларды кийинки муунга өткөрүп берүү — коомдун руханий өнүгүүсүнүн маанилүү шарттарынын бири экендигин белгилешти. Мындай иш-чаралар студенттердин улуттук аң-сезимин калыптандырууга, руханий-адептик баалуулуктарды бекемдөөгө жана өлкөнүн келечегине жоопкерчиликтүү жаштарды тарбиялоого өбөлгө түзөт.