Кыргызстан Ислам университетинде бүтүрүүчүлөрдү узатуу аземи өткөрүлдү

Кыргызстан Ислам университетинде бүтүрүүчүлөрдү узатуу аземи салтанаттуу түрдө өткөрүлдү. Иш-чара жогорку деңгээлде уюштурулуп, ага университеттин жетекчилиги, окутуучулар жамааты, студенттер жана сыйлуу коноктор катышты. Аземдин жүрүшүндө келген коноктор бүтүрүүчүлөрдү куттуктап, алардын келечектеги ишмердүүлүгүнө ийгиликтерди каалашты. Ошондой эле билим берүү жана тарбия жаатындагы үзүрлүү эмгеги үчүн бир катар окутуучуларга сыйлыктар тапшырылды. Кыргыз мусулмандарынын дин башкармалыгынын Диний билим берүү бөлүмүнүн башчысы Равшан ажы Эратов университеттин бир катар окутуучуларын «Ардак грамота» менен сыйлады. Мындан сырткары, Кыргыз Республикасынын Президентине караштуу Дин иштери жана этностор аралык мамилелер боюнча Улуттук агенттиктин төрагасынын орун басары Айбек Жакенович Иминов университеттин проректорлору Матраимов Абдуваси Нусуровичке жана Ниязов Бакыт устазга төш белги тапшырып, бир катар окутуучуларды «Ардак грамота» менен сыйлады. Ошондой эле Аалымдар кеңеши тарабынан окутуучуларга жана студенттерге «Ардак грамота» жана «Ыраазычылык баракчалары» ыйгарылды. Университеттин студенттер кеңеши да бүтүрүүчүлөргө өздөрүнүн эстелик белектерин тапшырып, майрамдык маанай тартуулашты. Майрамдык иш-чара төкмө акындардын өнөрү, көркөм программалар жана тамаданын коштоосу менен коштолуп, катышуучуларга жагымдуу маанай тартуулады. Бүтүрүү кечеси жаш адистерге ак жол каалоо менен жыйынтыкталды.