Кыргыз тил кунүнө карата Жогорку кеңеште өткөн кутуктоо аземи

Кыргыз Республикасынын Мамлекеттик тил күнүнө карата Жогорку Кеңеште салтанаттуу куттуктоо аземи жогорку деңгээлде өткөрүлдү. Бул иш-чара мамлекеттик тилдин коомдогу ордун бекемдөө, кыргыз тилинин өнүгүшүнө салым кошкон инсандарды урматтоо, улуттук баалуулуктарды сактоо жана аларды келечек муундарга жеткирүү максатында уюштурулду. Салтанаттуу аземге мамлекеттик жана коомдук ишмерлер, Жогорку Кеңештин депутаттары, илим жана маданият өкүлдөрү, жогорку окуу жайлардын окутуучулары, студенттер, чыгармачыл интеллигенция өкүлдөрү жана коомчулук катышышты. Иш-чаранын жүрүшүндө мамлекеттик тилдин тарыхый мааниси, анын улуттук аң-сезимди калыптандыруудагы орду, мамлекеттүүлүктү сактоодогу ролу жана кыргыз тилин өнүктүрүүнүн бүгүнкү күндөгү актуалдуу маселелери тууралуу мазмундуу баяндамалар жасалды. Аземдин алкагында кыргыз тилинин өнүгүшүнө жана жайылтылышына өзгөчө салым кошкон инсандар мамлекеттик жана коомдук сыйлыктар менен сыйланышты. Алардын катарында Кыргызстан Ислам университетинин ага окутуучусу Малатаева Нурипа Жаныбековна дагы Тил комиссиясы тарабынан «Кыргыз тили» төш белгиси менен сыйланды. Бул жогорку сыйлык анын мамлекеттик тилди өнүктүрүүгө, жаштарга сапаттуу билим жана тарбия берүүгө кошкон зор салымынын жогорку баасы катары белгиленди. Катышуучулар өз сөздөрүндө кыргыз тили улуттук биримдиктин, маданияттын, тарыхтын жана руханий мурастын негизги өзөгү экендигин баса белгилешип, мамлекеттик тилди өнүктүрүү ар бир жарандын ыйык милдети экенин айтышты. Ошондой эле жаш муундарга кыргыз тилин таза, бай жана көркөм түрдө үйрөтүүнүн маанилүүлүгү тууралуу ойлор ортого салынды. Иш-чара маданий программа менен коштолуп, анда кыргыз тилин, улуттук маданиятты жана руханий дөөлөттөрдү даңазалаган көркөм чыгармалар аткарылды. Обондуу ырлар, көркөм окуулар жана патриоттук чыгармалар аземге өзгөчө көрк берип, катышуучуларга майрамдык маанай тартуулады. Жогорку деңгээлде уюштурулган бул салтанат мамлекеттик тилге болгон урмат-сыйды дагы бир ирет арттырып, кыргыз тилинин коомдогу кадыр-баркын көтөрүүгө жана улуттук аң-сезимди бекемдөөгө чоң салым кошту.