КИУда фикх жана мурас илиминен студенттер арасында таймаш болду

Окуу жайыбызда белгилүү аалым, дааватчы жана устаз Чубак ажы Жалиловдун жаркын элесине арналган Ханафий мазхабындагы китептердин даражалары, ибадат бөлүмү жана мурас илими боюнча 4-курстар аралык илимий иш-чара болуп өттү. Иш-чаранын негизги максаты — студенттердин диний билим деңгээлин жогорулатуу, Ханафий мазхабынын илимий мурастарын терең өздөштүрүүгө кызыктыруу, ошондой эле жаштарды илимге, адеп-ахлакка жана биримдикке үндөө болду. Илимий таймашка 4-курстун студент кыздарынан түзүлгөн командалар жигердүү катышып, өздөрүнүн терең билимин, ой жүгүртүү жөндөмүн жана даярдыгын жогорку деңгээлде көрсөтүштү. Катышуучуларга Ханафий мазхабындагы негизги китептердин даражалары, ибадат маселелери, фыкх илими жана мурас бөлүштүрүү боюнча татаал жана кызыктуу суроолор берилип, командалар өз ара ынтымакта жооп беришти. Жыйынтыгында “Алиф” тайпасы эң жогорку упай топтоп, 1-орунду ээледи. Ал эми “Сыр сандык” тайпасы мыкты даярдыгы жана активдүү катышуусу менен 2-орунга татыктуу болду. Калган командалар дагы өздөрүнүн илимге болгон кызыгуусун жана аракетин көрсөтүп, көрүүчүлөр тарабынан жылуу колдоого ээ болушту. Иш-чаранын жүрүшүндө катышуучулар арасында достук, ынтымак жана илимге болгон сүйүү өзгөчө байкалып, студенттер үчүн пайдалуу тажрыйба аянтчасы түзүлдү. Чубак ажы Жалиловдун илимге болгон өзгөчө мамилеси, элге берген насааттары жана диний агартуу тармагындагы эмгектери тууралуу да кеңири эскерилип, анын мурасы жаш муун үчүн чоң үлгү экени белгиленди. Калыстар тобунун курамында окуу иштери боюнча проректор устаз Абдуваси Матраимов, КМАКтын мүчөсү устаз Элдияр Көбөнов, теология кафедрасынын башчысы устаз Султан Ташматов, филология кафедрасынын башчысы устаз Канат Орозобеков, ошондой эле устаздар Олжобай Алимбеков жана Акимжан уулу Мухаммед болушту. Алар катышуучулардын билим деңгээлин калыс баалап, адилеттүү чечим чыгарышты. Жеңүүчүлөргө жана активдүү катышуучуларга дипломдор, атайын сыйлыктар жана ыраазычылык баракчалары тапшырылды. Сыйлыктарды окуу иштери боюнча проректор устаз Абдуваси Матраимов, КМАКтын мүчөсү устаз Элдияр Көбөнов, теология кафедрасынын башчысы устаз Султан Ташматов жана филология кафедрасынын башчысы устаз Канат Орозобеков тапшырышты. Мындай илимий жана руханий иш-чаралар студенттердин диний билимге болгон кызыгуусун арттырып, алардын интеллектуалдык жана адеп-ахлактык жактан өсүшүнө чоң өбөлгө түзөт. Иш-чараны жогорку деңгээлде уюштурган Кыргызстан Ислам университетинин мугалими Кенжебаев Мирлан устазга жана уюштуруу бөлүмүнө терең ыраазычылык билдиребиз.