Кыргызстан Ислам университетинде белгилүү дин аалымы, устаз Тажибаев Имамали карынын жаркын элесине арналган «Куран-Нур» аттуу ыйык Куран окуу конкурсу болуп өттү.

Кыргызстан Ислам университетинде белгилүү дин аалымы, устаз Тажибаев Имамали карынын жаркын элесине арналган «Куран-Нур» аттуу ыйык Куран окуу конкурсу болуп өттү. Иш-чаранын негизги максаты — Куран илимин жайылтуу, жаштардын Куранга болгон сүйүүсүн арттыруу, ошондой эле маркум устаздын илимге жана динге кошкон зор салымын эскерүү болду. Конкурска университеттин студенттери активдүү катышып, Куранды көркөм жана туура окуу боюнча өз өнөрлөрүн көрсөтүштү. Катышуучулар тажвид эрежелерин сактоо, үн кооздугу жана окуу чеберчилиги боюнча бааланып, калыстар тобу тарабынан адилеттүү жыйынтык чыгарылды. Иш-чара өзгөчө руханий маанайда өтүп, катышуучулар менен коноктор Курандын адам жашоосундагы орду, илимдин жана адеп-ахлактын мааниси тууралуу пайдалуу насааттарды угушту. Ошондой эле Тажибаев Имамали карынын өмүр жолу, анын ислам илимине кошкон салымы жана тарбиялык мурасы тууралуу эскерүүлөр айтылды. Конкурстун соңунда жеңүүчүлөргө дипломдор, белектер жана атайын сыйлыктар тапшырылып, бардык катышуучуларга ыраазычылык билдирилди. Мындай руханий иш-чаралар жаштарды адептүүлүккө, билимге жана ыймандуулукка үндөп, коомдо руханий баалуулуктардын бекемделишине чоң салым кошот.