Кыргызстан Ислам университетинин окутуучулары Татарстан Республикасынын Болгар ислам академиясында өткөн «Жаштарды патриоттук тарбиялоодо дин аралык диалогдун ролу» аттуу эл аралык илимий-практикалык конференцияга активдүү катышышты.

Кыргызстан Ислам университетинин окутуучулары Татарстан Республикасынын Болгар ислам академиясында өткөн «Жаштарды патриоттук тарбиялоодо дин аралык диалогдун ролу» аттуу эл аралык илимий-практикалык конференцияга активдүү катышышты. Аталган конференция жаштардын патриоттук аң-сезимин калыптандыруу, улуттук жана руханий баалуулуктарды сактоо, ошондой эле дин аралык диалогду өнүктүрүү маселелерин талкуулоо максатында уюштурулду. Иш-чарага Россия Федерациясынын мамлекеттик органдарынын өкүлдөрү, белгилүү окумуштуулар, теологдор, дин таануучулар, тарыхчылар, коомдук ишмерлер, студенттер жана диний-светтик жогорку окуу жайлардын окутуучулары катышып, актуалдуу темалар боюнча өз пикирлерин билдиришти. Кыргызстан Ислам университетинин атынан конференцияга Гуманитардык билимдер факультетинин деканы Маматкулов Шамшидин Ирискулович, Акимбай уулу Равшанбек устаз жана Масылбаев Нурланбек Райымкулович катышып, мазмундуу илимий баяндамаларын сунушташты. Маматкулов Шамшидин Ирискулович «Жарандык иденттүүлүк, диний жана улуттук баалуулуктар: ааламдашуу доорунда иденттүүлүктү сактоо маселеси» аттуу баяндамасында глобалдашуу шартында улуттук өзгөчөлүктөрдү, маданий мурастарды жана руханий баалуулуктарды сактоонун маанисине токтолду. Ошондой эле жарандык иденттүүлүктү бекемдөөдө билим берүүнүн, үй-бүлөнүн жана коомдук институттардын орду тууралуу кеңири баяндады. Акимбай уулу Равшанбек устаз «Жаштардын патриоттуулугун калыптандыруудагы курал катары дин аралык диалог: Исламдын салттары кыргыз иденттүүлүгүнүн контекстинде» аттуу темада баяндама жасап, дин аралык ынтымакты бекемдөө, улуттук биримдикти сактоо жана жаштарга туура руханий тарбия берүү маселелерин көтөрдү. Ал ислам дининин салттуу баалуулуктары кыргыз элинин тарыхы жана маданияты менен тыгыз байланышта экенин өзгөчө белгиледи. Масылбаев Нурланбек Райымкулович болсо «Улуттук кодду сактоо: жарандык идентификация, салттуу баалуулуктар жана дин кыргыз коомунда» аттуу баяндамасында улуттук код түшүнүгү, анын коомдогу орду жана азыркы мезгилдеги мааниси тууралуу кеңири талдоо жүргүздү. Ал улуттук аң-сезимди, салттуу баалуулуктарды жана руханий мурастарды сактоо коомдун туруктуу өнүгүүсүнүн негизги факторлорунун бири экенин белгиледи. Конференциянын жүрүшүндө катышуучулар илимий пикир алмашып, дин аралык диалог, патриоттук тарбия, маданий иденттүүлүк жана жаштар саясаты боюнча маанилүү маселелерди талкуулашты. Мындай эл аралык деңгээлдеги иш-чаралар Кыргызстан Ислам университетинин илимий байланыштарын кеңейтүүгө, окутуучулардын тажрыйбасын арттырууга жана эл аралык кызматташтыкты бекемдөөгө чоң өбөлгө түзөт. ✨ Кыргызстан Ислам университетинин өкүлдөрүнө илимий жана агартуу багытындагы иштерине ийгиликтерди каалайбыз! 📚 Эл аралык кызматташтык жана илимий байланыштар мындан ары дагы өнүгө берсин!