Ислам илимдери жана араб тили боюнча эл аралык олимпиада Казань шаарында болуп өттү.

Россия Ислам Институтунда ислам илимдери жана араб тили боюнча эл аралык олимпиада болуп өттү. Аталган интеллектуалдык таймашка дүйнөнүн отуздан ашуун мамлекетинен келген студенттер катышып, өз билимдерин жана даярдыктарын сынашты. Олимпиаданын алкагында катышуучулар ислам илимдери, араб тили, фикх, хадис, тафсир жана башка диний багыттар боюнча күч сынашып, жогорку деңгээлдеги билимдерин көрсөтүштү. Иш-чара достук жана илимий маанайда өтүп, ар кайсы мамлекеттерден келген студенттердин өз ара тажрыйба алмашуусуна чоң мүмкүнчүлүк түздү. Кыргызстан Ислам университетинен (КИУ) олимпиадага жалпы үч студент катышты. Алардын ичинен фикх багыты боюнча Сакынов Адилет жогорку деңгээлдеги даярдыгын көрсөтүп, эл аралык олимпиадада 5-орунду ээледи. Бул жетишкендик университет үчүн чоң сыймык болуп саналат. Студенттерди олимпиадага даярдоо жана жетектеп баруу ишин Кыргызстан Ислам университетинин окуу бөлүмүнүн башчысы Тазабек уулу Эрназар устаз аркалады. Анын жетекчилиги, колдоосу жана эмгеги студенттердин ийгиликтүү катышуусуна чоң өбөлгө түздү. Кыргызстан Ислам университетинин жамааты Тазабек уулу Эрназар устазга жана олимпиадага катышкан бардык студенттерге терең ыраазычылык билдирип, мындан аркы окууларында жана илимий жолунда ийгиликтерди каалайт. Эл аралык деңгээлдеги мындай жетишкендиктер университеттин билим берүү сапатынын жана студенттердин даярдыгынын жогорку деңгээлин дагы бир жолу тастыктады.