Кыргызстан Ислам университетинде Студенттердин эл аралык күнүнө карата иш-чара болуп өттү.

Кыргызстан Ислам университетинде (КИУ) Студенттердин эл аралык күнүнө арналган салтанаттуу иш-чара болуп өттү. Иш-чарага университеттин ректору, дин аалымы Абдишүкүр ажы Нарматов, окуу иштери боюнча проректор Матраимов Абдуваси Нусурович, тарбия иштери боюнча проректор Бакыт Ныязов, ошондой эле университеттин окутуучулар жамааты жана студенттери катышты. Иш-чаранын жүрүшүндө университеттин ректору «Исламда жана адамзаттын жашоосунда илим-билимдин орду» аттуу мазмундуу баяндама жасап, билимдин маанилүүлүгүн, руханий-адеп-ахлактык тарбияны, билим алууга умтулууну жана жаштардын коом алдындагы жоопкерчилигин өзгөчө белгиледи. Ошондой эле студенттерге баалуу кеп-кеңештерин, насааттарын жана ак тилектерин айтты. Майрамдык программа жылуу жана достук маанайда өттү. Иш-чаранын алкагында руханий баалуулуктарды, биримдикти жана активдүү студенттик жашоону чыңдоого багытталган ар кандай маданий жана тарбиялык көрсөтүүлөр уюштурулду. Салтанаттын соңунда Куран окуу конкурсу жана спорттук мелдештерде байгелүү орундарды ээлеген студенттерге Ардак грамоталар жана эстелик белектер тапшырылды. Университет жетекчилиги жеңүүчүлөрдү куттуктап, аларга окууда, спортто жана коомдук иштерде мындан аркы ийгиликтерди каалады.