Кыргызстан Ислам университетинин студенттерине ӨКМ өтр коопсуздугу боюнча инструктаж өттү.

Кыргызстан Ислам университетинин (КИУ) студенттерине Кыргыз Республикасынын Өзгөчө кырдаалдар министрлигинин өкүлдөрү тарабынан өрт коопсуздугу боюнча атайын инструктаж өткөрүлдү. Иш-чаранын негизги максаты — студенттердин жана окутуучулардын өрт коопсуздугу боюнча маалымдуулугун жогорулатуу, өзгөчө кырдаалдар учурунда туура аракеттенүү көндүмдөрүн калыптандыруу жана коопсуздук маданиятын чыңдоо болду. Инструктажга окуу жайынын социалдык жана тарбия иштери боюнча проректору Бакыт Ныязов, ошондой эле университеттин окутуучулар жамааты жана студенттер активдүү катышышты. Жолугушуу учурунда өрт кырсыктарынын алдын алуу, эвакуация эрежелери, өрт чыккан учурда биринчи аракеттер, өрт өчүрүү каражаттарын туура колдонуу жана коопсуздук талаптарын сактоо боюнча кеңири маалыматтар берилди. Инструктажды Кыргыз Республикасынын ӨКМине караштуу Свердлов райондук өрт өчүрүү жана өрт коопсуздугунун алдын алуу бөлүмүнүн өкүлдөрү — капитан Саматбек уулу Айдар жана капитан Мураталы уулу Ырысбек жүргүзүштү. Алар студенттерге турмушта жана окуу жайда көп кездешкен кооптуу кырдаалдар тууралуу мисалдарды келтирип, өзгөчө кырдаал жаралган учурда сабырдуулукту сактоо жана ыкчам аракеттенүүнүн маанилүүлүгүн белгилешти. Мындан тышкары, өрт коопсуздугу боюнча практикалык кеңештер берилип, өрт өчүрүүчү шаймандарды колдонуу жолдору түшүндүрүлдү. Студенттер кызыккан суроолорун берип, адистерден кеңири жоопторду алышты. Иш-чара жогорку деңгээлде уюштурулуп, катышуучулар үчүн пайдалуу жана мазмундуу болду. Университет жетекчилиги мындай профилактикалык жолугушуулар студенттердин коопсуздук маданиятын өнүктүрүүдө жана өзгөчө кырдаалдардын алдын алууда чоң мааниге ээ экенин белгиледи.