“Кыргыз — Кувейт байланыштары” аттуу китептин араб тилдеги котормосу жарык көрдү

Бүгүн, 5-апрель бейшемби күнү Махмуд Кашгари Барскани атындагы чыгыш университетинде Кыргызстан Ислам университетинин окутуучусу, Тарых илимдеринин доктору, профессор Асан Ормушевдин араб тилине которулган “Кыргыз — Кувейт байланыштары” аттуу китебинин бет ачар аземи болуп өттү.

Алгач М. Кашгари ат. чыгыш университетинин ректору Алмаз Ибраев сөз сүйлөп, агайдын бул эмгеги өтө маанилүү экендигин айтты. Анткени аталган эмгекте Кыргыз-Кувейт алакаларынын түптөлүшүнөн баштап азыркы учурдагы абалы жана жетишкендиктер камтылган. Чыгыш университетинин түптөлүшү Кыргыз-Кувейт алакаларынын негизги жетишкендиктеринин бири болуп, ага Асан Сулаймановичтин салымы зор экендигин баса белгиледи.

М. Кашгари атындагы чыгыш университетинин араб тили жана лингвистика кафедрасынын демилгеси менен которулган китептин бет ачар аземине Кыргыз Республикасынын Билим берүү жана илим министрлигинен, Кыргыз улуттук илимдер академиясынан, Кыргыз Республикасынын тышкы иштер министрлигинен, Бишкек шаарындагы ЖОЖдордон, Кыргыз Республикасынын дин иштери боюнча мамлекеттик дин комиссиясынан, Кыргызстан мусулмандарынын Аалымдар Кеңешинен, Кыргызстан мусулмандарынын дин башкармалыгынан, Массалык маалымат каражаттарынан өкүлдөр катышты. Ал эми Кыргызстан Ислам Университетинен Аалымдар кеңешинин төрагасынын орун басары жана КИУнун тышкы алака жана социалдык иштер боюнча проректору Марс Ибраев катышып, Асан Сулаймановичти бул ийгилиги менен Аалымдар кеңешинин төрагасы, КИУнун ректору Абдишүкүр ажы Нарматовдун атынан жана жеке өзүнүн атынан куттуктады жана эки элдин ортосундагы мамилени чыңдоого кошкон зор салымы үчүн терең ыраазычылык билдирди. КИУнун проректору Асан Сулаймановичтин бул эмгеги алгачкы да, акыркы да эмес экендигине токтолуп, агай менен Кыргызстан Ислам Университетинин жалпы мугалимдер жамааты жана студенттери сыймыктанарын баса белгиледи.

Аземдин аягында тарых илимдеринин доктору, профессор Ормушев Асан Сулайманович жалпы катышуучуларга ыраазычылык билдирди.

Добавить комментарий